പരിയാരം കണ്ണൂർ ഗവ. മെഡിക്കൽ കോളേജിൽ എച്ച്ഡിഎസ് സഹകരണത്തോടെ നവീകരിച്ച ഡയാലിസിസ് യൂണിറ്റ് എം വിജിൻ എംഎൽഎ ഉദ്ഘാടനം ചെയ്തു. ദയ ചാരിറ്റബിൾ സൊസൈറ്റിയും ഔഷധിയും ചേർന്ന് ലഭ്യമാക്കിയ മൂന്ന് പുതിയ ഡയാലിസിസ് മെഷീനുകളുടെ ഉദ്ഘാടനവും ഇതോടൊപ്പം നടന്നതായി അധികൃതർ അറിയിച്ചു.
ആശുപത്രി സൂപ്രണ്ട് കെ ടി മാധവൻ ചടങ്ങിൽ അധ്യക്ഷത വഹിച്ചു. ഡോ. കെ സുദീപ്, ഡോ. വൈ പ്രവീൺ കുമാർ, ഡോ. വിമൽ റോഹൻ, ആർഎംഒ ജ്യോതി ദാമോദർ, ഡോ. സരിൻ, ഡോ. കെ പി മനോജ് കുമാർ, ദയ ചാരിറ്റബിൾ സൊസൈറ്റി സെക്രട്ടറി സീബാ ബാലൻ തുടങ്ങിയവർ സംസാരിച്ചു. ഡോ. അമിത പ്രേം സ്വാഗതവും ഡോ. കെ കെ അതുല്യ നന്ദിയും രേഖപ്പെടുത്തി.
