കണ്ണൂർ: വനിതകളുടെ തൊഴില് പങ്കാളിത്തം ഗണ്യമായി വർദ്ധിപ്പിക്കാൻ ലക്ഷ്യമിട്ട് കുടുംബശ്രീ ജില്ലാ മിഷൻ സമഗ്ര പദ്ധതി.
വിജ്ഞാന കേരളത്തിന്റെ സഹകരണത്തോടെ നടപ്പാക്കുന്ന 'ഉയരെ' ക്യാമ്പയിനിലൂടെ ജില്ലയിലെ 30,000 സ്ത്രീകള്ക്ക് വൈവിധ്യമാർന്ന മേഖലകളില് തൊഴില് ലഭ്യമാക്കാനാണ് ലക്ഷ്യം. ഏപ്രില് 30 വരെ തുടരുന്ന ക്യാമ്ബയിൻ ജില്ലയില് സാമ്ബത്തിക വികസനത്തിന്റെ പുതിയ അധ്യായം തുറക്കുമെന്ന് പ്രതീക്ഷിക്കുന്നു.
സാന്ത്വന പരിചരണം, നിർമാണ മേഖല, സ്കില് അറ്റ് കോള്, ഷോപ്പ് അറ്റ് ഡോർ, പരമ്ബരാഗത തൊഴില് മേഖലകള് എന്നിവിടങ്ങളിലാണ് പ്രധാനമായും തൊഴിലവസരങ്ങള് ഒരുക്കുന്നത്.
സ്കില് അറ്റ് കോള് പദ്ധതിയില് ഇലക്ട്രീഷ്യൻ, പ്ലംബർ, പെയിന്റർ, ഗാർഡനിംഗ്, ലാൻഡ് സ്കേപ്പിംഗ്, ലോണ്ഡ്രി, അയേണിംഗ് സർവീസ്, മൊബൈല് കാർവാഷ് തുടങ്ങിയ വീടുകളുടെയും സ്ഥാപനങ്ങളുടെയും അറ്റകുറ്റപ്പണി പരിപാലന സേവനങ്ങള് ഉള്പ്പെടുന്നു.
താല്പര്യമുള്ള മേഖലകള് കണക്കിലെടുത്ത് കുടുംബശ്രീയുടെ എംപാനല് ചെയ്ത സ്കില് ട്രെയിനിംഗ് ഇൻസ്റ്റിറ്റിയൂട്ടുകളിലും റുഡ്സെറ്റിലും സമഗ്രമായ പരിശീലനം നല്കിയതിന് ശേഷമാണ് നിയമനം നടത്തുന്നത്. സ്ത്രീകളുടെ സാമ്ബത്തികവും സാമൂഹികവും മാനസികവുമായ ശാക്തീകരണം ഉറപ്പാക്കുന്ന തരത്തിലാണ് പദ്ധതി രൂപകല്പ്പന ചെയ്തിരിക്കുന്നത്.
പങ്കാളിത്തം ഇരട്ടിയാക്കും
സുരക്ഷിതമായ തൊഴില് സാഹചര്യങ്ങളും തുല്യനീതിയും ഉറപ്പാക്കുന്ന 'ഉയരെ' പദ്ധതി സ്ത്രീകളുടെ തൊഴില് പങ്കാളിത്തം നിലവിലെ 20 ശതമാനത്തില് നിന്ന് 50 ശതമാനമായി ഉയർത്താൻ ലക്ഷ്യമിടുന്നു.
സ്ത്രീകള്ക്കിടയില് സംരംഭകത്വം വളർത്തുക, ദാരിദ്ര്യ നിർമാർജനം ത്വരിതപ്പെടുത്തുക, വേതനാധിഷ്ഠിത തൊഴിലുകള്ക്ക് മുൻഗണന നല്കി സുരക്ഷാ മാനദണ്ഡങ്ങള് ഉറപ്പാക്കുക എന്നിവയും പദ്ധതിയുടെ പ്രധാന ലക്ഷ്യങ്ങളാണ്.
സ്നേഹിത ഹെല്പ് ഡെസ്കിന് എട്ട് വയസ്
സ്ത്രീകള്ക്കും കുട്ടികള്ക്കും സമഗ്രമായ പിന്തുണ ഉറപ്പാക്കുന്ന കുടുംബശ്രീ സ്നേഹിത ജെൻഡർ ഹെല്പ് ഡെസ്ക് ജില്ലയില് വിജയകരമായി എട്ട് വർഷം പിന്നിടുന്നു. ഈ കാലയളവില് 3,500ത്തോളം കേസുകള് രജിസ്റ്റർ ചെയ്തിട്ടുണ്ട്.
ഇതില് 716 പേർക്ക് താല്ക്കാലിക സംരക്ഷണവും 164 പേർക്ക് വിവിധ കേന്ദ്രങ്ങളിലായി പുനരധിവാസവും നല്കിയിട്ടുണ്ട്. കൗണ്സിലിംഗ് സേവനത്തിനായി 2,900 പേർ സ്നേഹിതയെ സമീപിച്ചു.
ബോധവല്ക്കരണത്തിനായി 5,000 വിവിധ കേന്ദ്രങ്ങളില് പ്രത്യേക ക്ലാസുകള് സംഘടിപ്പിച്ചിട്ടുണ്ട്. കണ്ണൂർ തെക്കിബസാറിലാണ് സ്നേഹിത ജെൻഡർ ഹെല്പ് ഡെസ്ക് പ്രവർത്തിക്കുന്നത്. ബന്ധപ്പെടാൻ ഇ മെയില്: kannurnsehitha17@gmail.com.
ഫോണ്: 0497 2721817, 9188939700. ടോള് ഫ്രീ: 1800 4250717.
