കണ്ണൂർ: കോർപ്പറേഷൻ തിരഞ്ഞെടുപ്പിൽ ഔദ്യോഗിക സ്ഥാനാർത്ഥിക്കെതിരെ മത്സരിക്കുന്ന വിമത സ്ഥാനാർത്ഥിയെ കോൺഗ്രസ് പാർട്ടിയിൽ നിന്ന് പുറത്താക്കി. കണ്ണൂർ കോർപ്പറേഷൻ പയ്യാമ്പലം ഡിവിഷനിലാണ് സംഭവം.
യു.ഡി.എഫ്. മേയർ സ്ഥാനാർത്ഥിയായി പരിഗണിക്കുന്ന അഡ്വ. പി. ഇന്ദിരയ്‌ക്കെതിരെ മത്സരിക്കുന്ന കെ.എൻ. ബിന്ദുവിനെയാണ് ഡി.സി.സി. പുറത്താക്കിയത്. ബിന്ദുവിന് പിന്തുണ നൽകിയ ബൂത്ത് പ്രസിഡന്റ് എം.പി. രഘൂത്തമനെയും സസ്‌പെൻഡ് ചെയ്തതായി ഡി.സി.സി. അധ്യക്ഷൻ മാർട്ടിൻ ജോർജ് വാർത്താക്കുറിപ്പിൽ അറിയിച്ചു.
ശക്തമായ പോരാട്ടം
കോൺഗ്രസിന്റെ ഉറച്ച കോട്ടകളിലൊന്നാണ് പയ്യാമ്പലം ഡിവിഷൻ. നിലവിലെ ഡെപ്യൂട്ടി മേയർ കൂടിയായ അഡ്വ. പി. ഇന്ദിരയാണ് യു.ഡി.എഫ്. സ്ഥാനാർത്ഥി. കഴിഞ്ഞ തവണ ഇവിടെ കോൺഗ്രസിലെ ജയസൂര്യയാണ് വിജയിച്ചത്.
പാർട്ടിയിൽ വലിയ സ്വാധീനമുള്ള നേതാവാണ് പുറത്താക്കപ്പെട്ട കെ.എൻ. ബിന്ദു. വിമത സ്ഥാനാർത്ഥിയുടെ സാന്നിധ്യം മുന്നണിക്ക് വലിയ ക്ഷീണമാകുമെന്ന് വിലയിരുത്തപ്പെടുന്നു. എങ്കിലും വീടുകൾ കയറിയുള്ള പ്രചാരണത്തിലൂടെ വോട്ട് ഉറപ്പിക്കാനുള്ള തീവ്ര ശ്രമത്തിലാണ് ഇന്ദിരയും കോൺഗ്രസ് പ്രവർത്തകരും.
സി.പി.എം. സ്ഥാനാർത്ഥിയായി പ്രമുഖ അഭിഭാഷക അഡ്വ. വിമലകുമാരിയാണ് ഇവിടെ മത്സരിക്കുന്നത്. ബി.ജെ.പിക്ക് വേണ്ടി അപർണാ പുരുഷോത്തമനും രംഗത്തുണ്ട്.
