കണ്ണൂർ: കണ്ണൂർ ജില്ലയിലെ മുഴുവൻ ഹോട്ടലുകളിലും ഓണാഘോഷത്തിന് മുന്നോടിയായി തണുത്ത പാനീയങ്ങള് വില്ക്കുന്ന കടകളിലും ആരോഗ്യ വകുപ്പ് പരിശോധന ശക്തമാക്കുമെന്ന് ഡി.എം.ഒ (ആരോഗ്യം) ഡോ.പീയുഷ് എം നമ്പൂതിരിപ്പാട് അറിയിച്ചു.
മഞ്ഞപ്പിത്ത വ്യാപനം റിപ്പോർട്ട് ചെയ്ത തളിപ്പറമ്പ് താലൂക്കില് ജില്ലാ സർവൈലൻസ് ഓഫീസർ ഡോ. കെ.സി.സച്ചിന്റെ നേതൃത്വത്തിലുള്ള സംഘം പ്രത്യേക പരിശോധന നടത്തും.
പ്രദേശത്തെ ഭക്ഷണം, കുടിവെള്ളം എന്നിവയുടെ പരിശോധന ഊർജിതമാക്കും. കടക്കാർക്കും പൊതുജനങ്ങള്ക്കും ആരോഗ്യ വകുപ്പ് ജാഗ്രതാ നിർദേശം നല്കി.
ജീവനക്കാർക്ക് ഹെല്ത്ത് കാർഡ് ഉണ്ടായിരിക്കണമെന്നും കാർഡ് ഇല്ലാത്തവർക്കെതിരെ പിഴ ചുമത്തുമെന്നും ഭക്ഷണ വിതരണ സ്ഥാപനങ്ങള്ക്ക് നിർദേശം നല്കി.
ഉപയോഗിക്കുന്ന കുടിവെള്ളത്തിന്റെ പരിശോധനാ റിപ്പോർട്ട് സ്ഥാപനങ്ങളില് ഉണ്ടായിരിക്കണം. വ്യാജ കുടിവെള്ള പരിശോധന റിപ്പോർട്ട് ഹാജരാക്കിയാല് കർശന നടപടി സ്വീകരിക്കും.
അത്തരം കേസുകളില് ആരോഗ്യ വകുപ്പ് കുടിവെള്ള സാമ്പിള് നേരിട്ട് ശേഖരിച്ച് പരിശോധന നടത്തി നടപടി സ്വീകരിക്കും. ഭക്ഷണ വിതരണ ശാലകളില് പൊതുജനങ്ങള്ക്ക് കുടിക്കാൻ നല്കുന്ന വെള്ളം തിളപ്പിച്ചാറിയതിന് ശേഷം മാത്രം നല്കുക. വെള്ളം തണുപ്പിക്കാൻ പച്ചവെള്ളം ഉപയോഗിക്കാൻ പാടില്ല.
ഇത് ശ്രദ്ധയില്പ്പെട്ടാല് കർശന നടപടി സ്വീകരിക്കും. ഭക്ഷണം, കുടിവെള്ളം എന്നിവ വിതരണം ചെയ്യുന്ന സ്ഥാപനങ്ങളിലെ ജീവനക്കാർ നിർബന്ധമായും കൈയുറ ധരിക്കണം.
തണുത്ത പാനീയങ്ങള് തയ്യാറാക്കുന്നതിന് തിളപ്പിച്ചാറ്റിയ വെള്ളമോ യു വി ഫില്റ്റർ ചെയ്ത വെള്ളമോ മാത്രം ഉപയോഗിക്കണമെന്ന് തണുത്ത പാനീയങ്ങള് വില്ക്കുന്ന സ്ഥാപനങ്ങള്ക്കും നിർദേശം നല്കി.
ടെക്സ്റ്റൈല്/ ജുവലറികള് ഉള്പ്പെടെയുള്ള സ്ഥാപനങ്ങള് ഉപഭോക്താക്കള്ക്ക് നല്കുന്ന തണുത്ത പാനീയങ്ങളുടെ ശുദ്ധിയും പാനീയം തയായാറാക്കുന്ന ജീവനക്കാരുടെ ഹെല്ത്ത് കാർഡും കട ഉടമകള് ഉറപ്പുവരുത്തണം.
ഭക്ഷണ വിതരണത്തില് ആരോഗ്യ മാനദണ്ഡങ്ങള് പാലിക്കാത്ത സ്ഥാപനങ്ങള്ക്കെതിരെ പൊതുജനങ്ങള്ക്ക് വാട്സ്ആപ്പ് നമ്പറിൽ പരാതി നല്കാം. പരാതികള് ഫോട്ടോ, വീഡിയോ, മറ്റ് വിവരങ്ങള് എന്ന ഫോർമാറ്റിലും അയക്കാം. അയക്കുന്ന വ്യക്തിയുടെ വിവരങ്ങള് രഹസ്യമായി സൂക്ഷിക്കും. അയക്കേണ്ട നമ്പർ: 9846056161
ജില്ലാ ആരോഗ്യ വകുപ്പിന്റെ പരിശോധനയില് കൃത്യമായ ആരോഗ്യ മാനദണ്ഡങ്ങള് പാലിക്കാത്തതായി കണ്ടെത്തുന്ന ഭക്ഷണ, പാനീയ വിതരണ സ്ഥാപനങ്ങള്ക്കെതിരെ പൊതുജനാരോഗ്യ നിയമ പ്രകാരം കർശനമായ നടപടി സ്വീകരിക്കുമെന്ന് ജില്ലാ മെഡിക്കല് ഓഫീസർ അറിയിച്ചു.
പൊതുജനങ്ങള് ശ്രദ്ധിക്കേണ്ട കാര്യങ്ങള്
1. കടകളില് നിന്ന് ഭക്ഷണം കഴിക്കുന്നവർ ഭക്ഷണത്തിന്റെ വൃത്തി ഉറപ്പു വരുത്തണം
2. തൊഴിലാളികള് കൈയുറ ധരിച്ചാണ് ഭക്ഷണം വിതരണം ചെയ്യുന്നത് എന്ന് ഉറപ്പാക്കണം
3. കുടിക്കാൻ നല്കുന്ന വെള്ളത്തില് പച്ചവെള്ളം കലർത്തിയിട്ടില്ലെന്ന് ഉറപ്പാക്കണം
4. ഹോട്ടലുകളിലെ ടോയ്ലറ്റ് ഉപയോഗിക്കുന്നവർ സോപ്പ് ഉപയോഗിച്ച് കൈകള് കഴുകണം
5. മഞ്ഞപ്പിത്ത ലക്ഷണങ്ങള് ഉള്ളവർ ഉടനടി ശരിയായ ചികിത്സ തേടണം
6. വീടുകളില് മഞ്ഞപ്പിത്ത രോഗ ബാധയുള്ളവർ ഉപയോഗിക്കുന്ന ടോയ്ലറ്റുകള് മറ്റുള്ളവരെ ഉപയോഗിക്കാൻ അനുവദിക്കരുത്
