പയ്യന്നൂർ: പയ്യന്നൂരില് രാത്രി ഡ്യൂട്ടിക്കിടെ ഉറങ്ങിപ്പോയി. പൊലീസ് ഉദ്യോഗസ്ഥർക്ക് സ്ഥലം മാറ്റം. പയ്യന്നൂർ പൊലീസ് സ്റ്റേഷനിലെ മൂന്ന് സിപിഒമാരെയാണ് സ്ഥലം മാറ്റിയത്.
രാത്രി ഡ്യൂട്ടിക്കിടെ ഉറങ്ങിപ്പോയതിനാണ് നടപടി. ലോക്കപ്പില് പ്രതികള് ഉണ്ടായിരിക്കെയാണ് സിപിഒമാർ ഉറങ്ങിയതെന്നാണ് കണ്ടെത്തല്.
സിപിഒമാരായ കെ പ്രശാന്ത്, വി സി മുസമ്മില്, വി നിധിൻ എന്നിവരെയാണ് സ്ഥലം മാറ്റിയത്. ഈ മാസം 17നാണ് തളിപ്പറമ്പ് ഡിവൈഎസ്പി പ്രേമചന്ദ്രൻ സ്റ്റേഷനില് നേരിട്ടെത്തി പരിശോധന നടത്തിയത്.
കണ്ണൂർ റൂറല് എസ്പിക്ക് ലഭിച്ച പരാതിക്ക് പിന്നാലെയായിരുന്നു പരിശോധന. പരിശോധനയില് മൂന്ന് സിപിഒമാരും ഉറങ്ങുന്നതായി കണ്ടെത്തുകയും ഡിവൈഎസ്പി റിപ്പോർട്ട് നല്കുകയുമായിരുന്നു.
ഇതിൻ്റെ അടിസ്ഥാനത്തില് കണ്ണൂർ റൂറല് എസ്പിയാണ് സ്ഥലം മാറ്റത്തിന് തീരുമാനം എടുത്തത്. മൂന്ന് പേരെയും തൊട്ടടുത്ത സ്റ്റേഷനിലേക്കാണ് സ്ഥലം മാറ്റിയത്.
