കണ്ണൂർ : കണ്ണൂർ ടൗണ്‍ പൊലിസ് സ്റ്റേഷനില്‍ വിജിലൻസ് പരിശോധന നടത്തി. ചൊവ്വാഴ്ച്ച രാവിലെയാണ് കണ്ണൂർ വിജിലൻസ് ഡി.വൈ.എസ്.പി സുരേഷ് ബാബുവിൻ്റെ നേതൃത്വത്തില്‍ പരിശോധന നടത്തിയത്.
പരിശോധന ഒരു മണിക്കൂറോളം നീണ്ടുനിന്നു. വിജിലൻസിന് ലഭിച്ച പരാതിയെ തുടർന്നാണ് പരിശോധന നടത്തിയതെന്ന് വിജിലൻസ് ഡി.വൈ.എസ്.പി മാധ്യമങ്ങളോട് പ്രതികരിച്ചു.
കണ്ണൂരിലെ വ്യാപാരിയും ബ്ളോഗറുമായ വ്യക്തിയില്‍ നിന്നും സ്വർണം പൂശിയ മുത്തപ്പൻ വിളക്ക് സ്റ്റേഷൻ ഹൗസ് ഓഫീസർ ശ്രീജിത്ത് കൊടേരി പിറന്നാള്‍ ഉപഹാരമായി സ്വീകരിച്ചതിൻ്റെ വീഡിയോ ദൃശ്യം സോഷ്യല്‍ മീഡിയയില്‍ റീല്‍സായി പ്രചരിച്ചിരുന്നു.
ഇതുമായി ബന്ധപ്പെട്ട് പരാതി നല്‍കിയ മാധ്യമപ്രവർത്തകനായ യുവാവ് മുഖ്യമന്ത്രിക്ക് പരാതി നല്‍കിയിരുന്നു. ഇതിനോടൊപ്പം വിജിലൻസിനും പരാതി നല്‍കിയതായാണ് പരാതി.
കണ്ണൂർ നഗരത്തിലെ വ്യാപാരിയും ബ്ലോഗറുമായ വ്യക്തിയുടെ വ്യാപാര സ്ഥാപനത്തിലെത്തി എസ്.എച്ച്‌.ഒ ശ്രീജിത്ത് കൊടേരി ഉപഹാരം കൈപ്പറ്റുന്ന ദൃശ്യമടക്കമാണ് വിജിലൻസിന് പരാതിയായി ലഭിച്ചത്.
മുഖ്യമന്ത്രിക്ക് ലഭിച്ച പരാതിയുടെ അടിസ്ഥാനത്തില്‍ ശ്രീജിത്ത് കൊടേരിക്കെതിരെ സ്പെഷ്യല്‍ ബ്രാഞ്ച് എസിപിയുടെ നേതൃത്വത്തില്‍ അന്വേഷണം നടന്നു വരികയാണ്.
