മുംബൈ: ഇന്ഡിഗോ വിമാന സർവീസുകളുടെ റദ്ദാക്കൽ ഇന്നും തുടരുന്നു. രാജ്യത്തുടനീളം ആയിരത്തിലധികം സർവീസുകൾ ഇന്ന് മുടങ്ങുമെന്ന് വിമാനക്കമ്പനി അറിയിച്ചു. പത്ത് ദിവസത്തിനുള്ളിൽ സ്ഥിതിഗതികൾ സാധാരണനിലയിലാകുമെന്നാണ് കമ്പനിയുടെ വിശദീകരണം.
കേരളത്തിൽ തിരുവനന്തപുരത്ത് അഞ്ച് സർവീസുകളും കണ്ണൂരിൽ മൂന്ന് സർവീസുകളും റദ്ദാക്കിയിട്ടുണ്ട്. ഡൽഹി, ചെന്നൈ, മുംബൈ, ബംഗളൂരു ഉൾപ്പെടെയുള്ള പ്രധാന നഗരങ്ങളിലെ സർവീസുകളെയും പ്രതിസന്ധി സാരമായി ബാധിച്ചു. കഴിഞ്ഞ കുറച്ച് ദിവസങ്ങളായി രാജ്യത്തെ വിവിധ വിമാനത്താവളങ്ങളിൽ പ്രതിഷേധം തുടരുകയാണ്. അടിയന്തര യാത്രകൾക്കായി എത്തുന്നവർ മണിക്കൂറുകളാണ് വിമാനത്താവളങ്ങളിൽ കാത്തുകെട്ടിക്കിടക്കുന്നത്.
മുംബൈ, ഡൽഹി, ചെന്നൈ, ബംഗളൂരു, ഹൈദരാബാദ് എന്നിവിടങ്ങളിൽ നിന്ന് സർവീസ് നടത്തേണ്ടിയിരുന്ന ഇൻഡിഗോ, എയർ ഇന്ത്യ വിമാനങ്ങൾ മണിക്കൂറുകളോളം വൈകി. മംഗളൂരുവിൽ നിന്നു മാത്രം 17 വിമാനങ്ങൾ അരമണിക്കൂറിലധികം വൈകിയാണ് പുറപ്പെട്ടത്.
🔍 അന്വേഷണം ആരംഭിച്ചു, കടുത്ത നടപടി ഉറപ്പ്
ഗുരുതരമായ ഈ തടസ്സങ്ങൾ കണക്കിലെടുത്ത്, വിമാനത്താവളത്തിലേക്ക് പോകുന്നതിന് മുമ്പ് യാത്രക്കാർ അവരുടെ വിമാനങ്ങളുടെ നില (Status) പരിശോധിക്കണമെന്ന് അധികൃതർ നിർദേശിച്ചു. വിമാനഡ്യൂട്ടി സമയ നിയന്ത്രണ ചട്ടങ്ങളിൽ (FDTL) ഇളവ് നൽകി വ്യോമയാന മന്ത്രാലയം പ്രതിസന്ധി പരിഹരിക്കാൻ ശ്രമം ആരംഭിച്ചിട്ടുണ്ട്.
ഉത്തരവാദികളായവർക്കെതിരെ കടുത്ത നടപടിയുണ്ടാകുമെന്ന കേന്ദ്ര സർക്കാരിന്റെ മുന്നറിയിപ്പിനെത്തുടർന്ന് വ്യോമയാന മന്ത്രാലയം സംഭവത്തിൽ അന്വേഷണം ആരംഭിച്ചു. നാലംഗ സമിതി ഇൻഡിഗോ ഉദ്യോഗസ്ഥരെ വിളിച്ച് വരുത്തും. ഈ മാസം 15-ന് റിപ്പോർട്ട് സമർപ്പിക്കുമെന്നും അധികൃതർ അറിയിച്ചു.
