.jpg)
കണ്ണൂർ: കണ്ണപുരം കീഴറയിലെ സ്ഫോടനക്കേസില്‍ അഞ്ചാം പ്രതി അറസ്റ്റില്‍. പാലക്കാട് ഏഴക്കാട് മുണ്ടൂർ സ്വദേശി സ്വാമിനാഥനെയാണ് (64) കണ്ണപുരം പൊലീസ് ഇൻസ്‌പെക്ടർ മഹേഷ് കണ്ടമ്പേത്ത് അറസ്റ്റ് ചെയ്തത്.
കേസിലെ പ്രതികളായ അനൂപ് മാലിക്ക്, അനീഷ്, റാഹില്‍ എന്നിവരെ നേരത്തേ അറസ്റ്റ് ചെയ്തിരുന്നു.
ഇവരുടെ മൊഴികളും മൊബൈല്‍ വിവരങ്ങളും ബാങ്ക് ഇടപാടുകളും നോക്കിയാണ് സ്വാമിനാഥനെ അറസ്റ്റ് ചെയ്തത്. കഴിഞ്ഞ ആഗസ്റ്റ് 30ന് പുലർച്ച 1.50ന് കണ്ണപുരം കീഴറയില്‍ അനൂപ് മാലിക്ക് വാടകക്കെടുത്ത വീട്ടിലാണ് സ്ഫോടനം നടന്നത്.
സംഭവത്തില്‍ വാടകവീട് തകരുകയും അനൂപ് മാലിക്കിന്റെ ബന്ധു മുഹമ്മദ് അഷം കൊല്ലപ്പെടുകയും സമീപവാസികളുടെ വീടുകള്‍ക്ക് നാശനഷ്ടം സംഭവിക്കുകയും ചെയ്തിരുന്നു.
കണ്ണൂർ സിറ്റി പൊലീസ് കമീഷണർ പി. നിധിൻരാജിന്റെ നിർദേശപ്രകാരം അസി. പൊലീസ് കമീഷണർ പ്രദീപൻ കണ്ണിപ്പൊയിലിന്റെ നേതൃത്വത്തില്‍ നടന്ന അന്വേഷണ സംഘത്തില്‍ എസ്.സി.പി.ഒ മഹേഷ്, സി.പി.ഒമാരായ അനൂപ്, റിജേഷ് കുമാർ എന്നിവരും ഉള്‍പ്പെട്ടിരുന്നു.
നിരവധി സ്ഫോടനക്കേസുകളില്‍ പ്രതിയാണ് അനൂപ് മാലിക്ക്. ഇയാളും റാഹിലും ജയിലിലാണ്.
.jpg&description=കണ്ണപുരം കീഴറയിലെ സ്ഫോടനം; അഞ്ചാം പ്രതി അറസ്റ്റില്‍\u200d){kind=link}