കണ്ണൂർ: സ്കൂള് യുവജനോത്സവത്തിന് പാലസ്തീൻ അനുകൂല കോല്‍ക്കളി നടത്തിയ വിദ്യാർത്ഥികളെ വേദിയില്‍ നിന്ന് ഇറക്കിവിട്ട് സ്കൂള് അധികൃതർ.കളിക്കാര്‍ ഫ്രീ ഫലസ്തീന്‍ ടി-ഷര്‍ട്ട് ധരിച്ചത് ചൂണ്ടിക്കാട്ടിയായിരുന്നു നടപടി.
അഞ്ചരക്കണ്ടി ഹയർ സെക്കൻഡറി സ്‌കൂളിലാണ് സംഭവം. സ്കൂള് യുവജനോത്സവത്തോട് അനുബന്ധിച്ച്‌ നടന്ന കോല്‍ക്കളിയാണ് പ്രിൻസിപ്പലും അധ്യാപകരും വേദിയിലെത്തി തടഞ്ഞത്. കളിക്കിടെ വിദ്യാർഥികളെ തിരിച്ചയക്കുകയായിരുന്നു.
ഹയല്‍ സെക്കൻഡറി വിഭാഗം വിദ്യാർഥികള്‍ അവതരിപ്പിച്ച കോല്‍ക്കളിയാണ് തടഞ്ഞത്. യുവജനോത്സവ മാന്വലിന് വിരുദ്ധമെന്നാരോപിച്ചാണ് നടപടി.
മത്സരം തുടങ്ങിയപ്പോള്‍ പ്രിൻസിപ്പല്‍ അടക്കമുള്ള അധ്യാപകർ വേദിയിലെത്തി മത്സരം നിർത്തി വെക്കാൻ ആവശ്യപ്പെട്ട് ഇറക്കി വിടുകയായിരുന്നു.
സിപിഎം നിയന്ത്രണത്തിലുള്ള സൊസൈറ്റിയുടെ ഉടമസ്ഥതയിലുള്ളതാണ് സ്കൂള്. കോല്‍ക്കളി തടഞ്ഞതിനെ തുടർന്ന് എംഎസ്‌എഫ്, കെഎസ്‌യു പ്രവർത്തകർ സ്‌കൂളിലേക്ക് മാർച്ച്‌ നടത്തി.
