കണ്ണൂർ: ജില്ലയിൽ അതിതീവ്ര മഴ തുടരുന്ന സാഹചര്യത്തിലും റെഡ് അലേർട്ട് നിലനിൽക്കുന്നതിനാലും ജലനിരപ്പ് സുരക്ഷിതമായി ക്രമീകരിക്കുന്നതിനായി പഴശ്ശി ഡാമിന്റെ 14 ഷട്ടറുകൾ തുറന്നു. ആകെ 16 ഷട്ടറുകളാണുള്ളത്. തിങ്കളാഴ്ച വൈകീട്ട് അഞ്ച് മണിക്ക് 20 മീറ്ററാണ് ഡാമിന്റെ ജലനിരപ്പ്. പരമാവധി ജലനിരപ്പ് +27.52 മീറ്റർ. രാവിലെ ഏഴ് മണിക്ക് ഡാമിൽ 158.6 മില്ലി മീറ്റർ മഴ രേഖപ്പെടുത്തി. ഡാമിന്റെ രണ്ടാമത്തെയും 13ാമത്തെയും ഷട്ടറുകൾ ഒഴികെ എല്ലാം തുറന്നിട്ടുണ്ട്. ജലനിരപ്പ് നിരന്തരം നിരീക്ഷിച്ച് ആവശ്യമായ നടപടികൾ സ്വീകരിച്ചുവരുന്നതായി പഴശ്ശി ഇറിഗേഷൻ അസി. എക്‌സിക്യുട്ടീവ് എൻജീനീയർ അറിയിച്ചു.
