കണ്ണൂർ: സംസ്ഥാന സർക്കാർ ജീവനക്കാർക്ക് സായാഹ്ന, പാർട് ടൈം കോഴ്സുകളോ ഓണ്‍ലൈൻ, വിദൂരവിദ്യാഭ്യാസ കോഴ്സുകളോ ചെയ്യാമോയെന്ന കാര്യത്തില്‍ വ്യക്തത വരുത്തി ഉത്തരവിറങ്ങി.
കോഴ്സുകളില്‍ പങ്കെടുക്കുന്നതുമായി ബന്ധപ്പെട്ട് വ്യക്തമായ മാർഗനിർദേശം ഇതുവരെ ഉണ്ടായിരുന്നില്ല. ഇതുമായി ബന്ധപ്പെട്ട ആശയക്കുഴപ്പം ഒഴിവാക്കുന്നതിനായാണ് ഉത്തരവിറക്കിയിരിക്കുന്നത്.
ജീവനക്കാർ ചേർന്ന് പഠിക്കാൻ താല്പര്യപ്പെടുന്ന കോഴ്സ് തുടങ്ങുന്നതിന് രണ്ട് മാസം മുൻപായി വകുപ്പ് മേധാവിക്ക് അപേക്ഷ നല്‍കണമെന്ന് പുതിയ ഉത്തരവില്‍ പറയുന്നു. അപേക്ഷ ലഭിച്ച്‌ 15 ദിവസത്തിനുള്ളില്‍ വകുപ്പ് മേധാവി തീരുമാനമെടുക്കണം. ജോലി ചെയ്യുന്ന സ്ഥാപനവുമായി 30 കിലോമീറ്റർ ദൂരത്തിനകത്തുള്ള സ്ഥാപനങ്ങളില്‍ മാത്രമേ ഉപരിപഠനം നടത്താൻ അനുമതി നല്‍കൂവെന്നും ഉത്തരവില്‍ പറയുന്നു.
ഉത്തരവിലെ മാർഗനിർദേശങ്ങള്‍ ഇങ്ങനെ
1. ജീവനക്കാർ ചേർന്ന് പഠിക്കാൻ താല്പര്യപ്പെടുന്ന കോഴ്സ് തുടങ്ങുന്നതിന് 2 മാസം മുൻപായി വകുപ്പ് മേധാവിക്ക് അപേക്ഷ സമർപ്പിക്കേണ്ടതാണ്.
2. അപേക്ഷ ലഭിച്ച്‌ 15 ദിവസത്തിനുള്ളില്‍ അപേക്ഷയിന്മേല്‍ വകുപ്പ് മേധാവി തീരുമാനമെടുക്കേണ്ടതാണ്.
3. കാലതാമസം ഒഴിവാക്കുന്നതിലേക്കായി ബന്ധപ്പെട്ട ജില്ലാ മേധാവി മുഖാന്തിരം വകുപ്പ് തലവന് നേരിട്ടോ ഓണ്‍ലൈൻ വഴിയോ അപേക്ഷ സമർപ്പിക്കാവുന്നതാണ്. അനുമതി നിഷേധിക്കുന്ന ഭരണാധികാരികള്‍ അപ്പീല്‍ നല്‍കുന്നതിനുള്ള സംവിധാനം ഏർപ്പെടുത്തേണ്ടതാണ്.
4. ജോലി ചെയ്യുന്ന സ്ഥാപനവുമായി 30 കിലോമീറ്റർ ദൂരത്തിനകത്തുള്ള സ്ഥാപനങ്ങളിലേക്കായി മാത്രമേ ഉപരി പഠനം നടത്തുന്നതിന് അനുമതി നല്‍കുവാൻ പാടുള്ളു. എന്നാല്‍ ഇത്തരം കോഴ്സുകളില്‍ പങ്കെടുക്കുന്നു എന്ന കാരണത്താല്‍ ഓഫിസ് സമയത്തില്‍ യാതൊരു ഇളവും അനുവദിക്കുന്നതല്ല.
5. ഓഫിസ് സമയത്ത് യാതൊരു വിധ ഓണ്‍ലൈൻ/ഓഫ്‌ലൈൻ കോഴ്‌സുകളിലും പങ്കെടുക്കുവാൻ പാടുള്ളതല്ല.
6. മുൻകൂർ അനുമതി കൂടാതെ ഓണ്‍ലൈൻ/ഓഫ്‌ലൈൻ കോഴ്സുകളില്‍ ചേർന്ന് പഠനം നടത്തുന്ന ജീവനക്കാർക്കെതിരെ ഉചിതമായ അച്ചടക്ക നടപടികള്‍ സ്വീകരിക്കാവുന്നതാണ്.
7. അടിയന്തര പ്രാധാന്യമുള്ള സാഹചര്യങ്ങളില്‍ ഔദ്യോഗിക നിർവഹണത്തിനായി ജീവനക്കാർ ഓഫിസ് പ്രവൃത്തി സമയം കഴിഞ്ഞും മേലധികാരിയുടെ നിർദ്ദേശാനുസരണം ഓഫീസില്‍ സേവനം ലഭ്യമാക്കേണ്ടതാണ്.
8. ഇത്തരം സന്ദർഭങ്ങളില്‍ പഠന കോഴ്സുകളില്‍ പങ്കെടുക്കുന്നു എന്ന കാരണത്താല്‍ ജീവനക്കാർക്ക് ഹാജർ സംബന്ധമായ ഇളവുകള്‍ അനുവദിക്കേണ്ടതില്ല. ഈ നിർദ്ദേശം ലംഘിക്കുന്ന പക്ഷം സർക്കാർ നല്‍കിയ അനുമതി റദ്ദ് ചെയ്തതായി കണക്കാക്കി തുടർനടപടികള്‍ സ്വീകരിക്കുന്നതാണ്.
9. കോഴ്സുകളില്‍ ചേർന്ന് പഠിക്കുന്ന ജീവനക്കാർക്ക് ഭരണ സൗകര്യാർഥം നടത്തുന്ന സ്ഥലംമാറ്റത്തില്‍ നിന്നും മേല്‍ കാരണത്താല്‍ സംരക്ഷണം ലഭിക്കുന്നതല്ല.