കണ്ണൂർ : ഹയർസെക്കൻഡറി പ്ലസ് വൺ ക്ലാസ് തിങ്കളാഴ്ച തുടങ്ങി. ജില്ലയിലാകെ 28,547 വിദ്യാർഥികളാണ് പ്രവേശനം നേടിയത്. വെള്ളിയാഴ്ചയാണ് മുഖ്യ അലോട്മെന്റ് പൂർത്തിയായത്. ഇതിൽ ജില്ലയിൽ 25,433 വിദ്യാർഥികൾ മെറിറ്റ് സീറ്റിൽ പ്രവേശനം നേടി. മെറിറ്റിൽ അവശേഷിക്കുന്ന സീറ്റുകൾ ഉൾപ്പെടുത്തി സപ്ലിമെന്ററി അലോട്മെന്റ് നടത്തും.ഓരോ സ്‌കൂളിലും ഒഴിവുള്ള സീറ്റുകളുടെ പട്ടിക ജൂലായ് രണ്ടിന് ഹയർസെക്കൻഡറി വകുപ്പിന്റെ വെബ്‌സൈറ്റിൽ പ്രസിദ്ധീകരിക്കും. അലോട്മെന്റ് ലഭിക്കാത്തവർക്ക് പട്ടിക പരിശോധിച്ച് അപേക്ഷ പുതുക്കാം. പുതുക്കാത്തവരെയും അലോട്മെന്റ് ലഭിച്ചിട്ടും സ്‌കൂളിൽ ചേരാത്തവരെയും തുടർന്നുള്ള അലോട്‌മെന്റിൽ പരിഗണിക്കില്ല. പുതിയ അപേക്ഷ നൽകാനും അവസരമുണ്ട്.
ജില്ലയിലുള്ള 38,020 പേരാണ് പ്ലസ് വണിന് അപേക്ഷ നൽകിയത്. വി.എച്ച്.എസ്.ഇ.യിൽ മുഖ്യ അലോട്മെന്റ് കഴിഞ്ഞപ്പോൾ 1005 വിദ്യാർഥികളാണ് പ്രവേശനം നേടിയത്. 555 സീറ്റ് ബാക്കിയുണ്ട്.