കണ്ണൂർ രാജ്യാന്തര വിമാനത്താവളത്തിൽ നിന്ന് കുവൈത്ത്, റിയാദ് സെക്ടറുകളിലേക്കുള്ള വിമാന സർവീസുകൾ പുനരാരംഭിക്കാൻ എയർ ഇന്ത്യ എക്സ്പ്രസ് ഒരുങ്ങുന്നു. പ്രവാസികൾക്ക് ഏറെ ആശ്വാസകരമാകുന്ന ഈ സർവീസുകളിലേക്കുള്ള ടിക്കറ്റ് ബുക്കിങ് ഇതിനകം തന്നെ ആരംഭിച്ചുകഴിഞ്ഞു. വരും മാസമായ ജൂലൈ 3 മുതലാണ് സർവീസുകൾ പുനഃക്രമീകരിച്ചിരിക്കുന്നത്. ആഴ്ചയിൽ മൂന്ന് ദിവസങ്ങളിലായിരിക്കും ഈ സർവീസുകൾ ലഭ്യമാകുക.
റിയാദ് സെക്ടറിൽ ഞായർ, തിങ്കൾ, വ്യാഴം ദിവസങ്ങളിലാണ് സർവീസ് ഉണ്ടായിരിക്കുക. ഉച്ചയ്ക്ക് 2 മണിക്ക് കണ്ണൂരിൽ നിന്ന് പുറപ്പെടുന്ന വിമാനം സൗദി പ്രാദേശിക സമയം വൈകുന്നേരം 4.35ന് റിയാദിൽ എത്തും. തിരിച്ച് റിയാദിൽ നിന്ന് പ്രാദേശിക സമയം വൈകുന്നേരം 5.35ന് പുറപ്പെട്ട് ഇന്ത്യൻ സമയം രാത്രി 1.35ന് കണ്ണൂരിൽ തിരിച്ചെത്തും.
ഇതേ ദിവസങ്ങളിൽ തന്നെയാണ് കുവൈത്തിലേക്കുള്ള സർവീസുകളും ക്രമീകരിച്ചിരിക്കുന്നത്. ഉച്ചകഴിഞ്ഞ് 3.25ന് കണ്ണൂരിൽ നിന്ന് പുറപ്പെടുന്ന വിമാനം പ്രാദേശിക സമയം വൈകുന്നേരം 6 മണിക്ക് കുവൈത്തിൽ എത്തും. തിരിച്ച് രാത്രി 7 മണിക്ക് കുവൈത്തിൽ നിന്ന് പുറപ്പെട്ട് ഇന്ത്യൻ സമയം പുലർച്ചെ 2.40ന് കണ്ണൂരിൽ എത്തിച്ചേരുന്ന രീതിയിലാണ് സമയക്രമം.
