തളിപ്പറമ്പ്: ഇന്ധന വിതരണത്തിൽ കേന്ദ്ര സർക്കാർ ഈയിടെ ഏർപ്പെടുത്തിയ കർശന നിയന്ത്രണങ്ങൾ കാരണം വടക്കൻ മലബാറിലെ വിവിധ തൊഴിൽ-വ്യവസായ മേഖലകൾ കടുത്ത പ്രതിസന്ധിയിലേക്ക്. വാഹനങ്ങൾക്ക് ഒരു തവണ നൽകാവുന്ന പരമാവധി ഇന്ധനം 200 ലിറ്ററായി വെട്ടിക്കുറച്ചതും, കുപ്പികളിലും സാധാരണ കാനുകളിലും ഇന്ധനം നൽകരുതെന്ന നിർദ്ദേശവുമാണ് തിരിച്ചടിയായത്. ടാങ്കറുകളിൽ നിന്ന് പമ്പുകളിലേക്കും, അവിടെ നിന്ന് വാഹനങ്ങളിലേക്കും നേരിട്ട് മാത്രമേ ഇന്ധന വിതരണം നടത്താവൂ എന്നാണ് പുതിയ നിയമം.
വാഹനങ്ങളിലല്ലാതെ ഇന്ധനം കൊണ്ടുപോകണമെങ്കിൽ പെട്രോളിയം ആൻഡ് എക്സ്പ്ലോസീവ്സ് സേഫ്റ്റി ഓർഗനൈസേഷൻ (PESO) അംഗീകൃത കണ്ടെയ്നറുകൾ തന്നെ ഉപയോഗിക്കണം. ചട്ടങ്ങൾ ലംഘിച്ച് 200 ലിറ്ററിൽ കൂടുതൽ ഇന്ധനം നൽകിയതിന് തളിപ്പറമ്പിലെ ഒരു പെട്രോൾ പമ്പിന്റെ ലൈസൻസ് അധികൃതർ കഴിഞ്ഞ ദിവസം സസ്പെൻഡ് ചെയ്തിരുന്നു. ഇതോടെ പമ്പുടമകളും കർശന നിയന്ത്രണങ്ങളിലേക്ക് കടന്നു.
പശ്ചിമേഷ്യൻ യുദ്ധത്തെത്തുടർന്നുണ്ടായ ആഗോള എണ്ണപ്രതിസന്ധി മറയാക്കിയാണ് കേന്ദ്രത്തിന്റെ ഈ പുതിയ നടപടി. ഇത് മലബാറിലെ മത്സ്യബന്ധനം, ചെങ്കൽ ക്വാറികൾ, ക്രഷറുകൾ, പരമ്പരാഗത കാർഷിക മേഖല എന്നിവയുടെ പ്രവർത്തനത്തെ പൂർണ്ണമായി താറുമാറാക്കിയിരിക്കുകയാണ്. നിലവിൽ വിപണിയിൽ 20 ലിറ്ററിന്റെ പെസോ (PESO) അംഗീകൃത കണ്ടെയ്നറുകൾക്ക് 2500 രൂപയോളമാണ് വില. ഇത് കേരളത്തിലെ വിപണിയിൽ ആവശ്യത്തിന് ലഭ്യവുമല്ല.
**ദുരിതത്തിലായി വിവിധ മേഖലകൾ:**
* **മത്സ്യബന്ധന മേഖല:** ചെറുകിട യാനങ്ങളെല്ലാം പെട്രോൾ എൻജിനുകളിലേക്ക് മാറിയതിനാൽ മത്സ്യത്തൊഴിലാളികൾക്ക് പ്രതിദിനം ശരാശരി 25 ലിറ്റർ പെട്രോൾ ആവശ്യമുണ്ട്. പമ്പുകളില്ലാത്ത തീരദേശങ്ങളിൽ കാനുകളിലും കുപ്പികളിലുമായിരുന്നു ഇവർ ഇന്ധനം എത്തിച്ചിരുന്നത്. ഇത് നിലച്ചതോടെ വള്ളങ്ങൾ കായലിലും കടലിലും ഇറക്കാൻ പറ്റാത്ത അവസ്ഥയിലാണ്.
* **ആരോഗ്യ മേഖല:** വൻകിട ജനറേറ്ററുകൾ പ്രവർത്തിപ്പിക്കുന്ന ആശുപത്രികൾ, ഡയാലിസിസ് സെന്ററുകൾ എന്നിവ ഇന്ധനം ക്യാനുകളിൽ വാങ്ങാൻ കഴിയാതെ പ്രയാസപ്പെടുകയാണ്.
* **ക്വാറി, ചെങ്കൽപ്പണകൾ:** ചെങ്കൽപ്പണകളിലെ കട്ടിംഗ് യന്ത്രങ്ങൾ പ്രവർത്തിപ്പിക്കാൻ വലിയ തോതിൽ ഇന്ധനം ആവശ്യമുണ്ട്. പമ്പുകളിൽ നിന്ന് നേരിട്ട് പണകളിലേക്ക് ഇന്ധനം എത്തിക്കാൻ പുതിയ നിയമം അനുവദിക്കുന്നില്ല.
* **ഗതാഗത മേഖല:** നാഷണൽ പെർമിറ്റ് ലോറികളും ദീർഘദൂര ബസുകളും 200 ലിറ്റർ പരിധി കാരണം വഴിയിലുടനീളം പമ്പുകൾ കയറിയിറങ്ങേണ്ട അവസ്ഥയിലാണ്.
നിയന്ത്രണങ്ങൾ കാരണം ജില്ലയിലെ ഇരുന്നൂറോളം പെട്രോൾ പമ്പുകളിൽ ഇന്ധന വിൽപനയിൽ ഗണ്യമായ കുറവുണ്ടായിട്ടുണ്ട്. ഇന്ധന വിൽപന കുറഞ്ഞതോടെ വൻ വരുമാനനഷ്ടമാണ് നേരിടുന്നതെന്ന് പഴയങ്ങാടിയിലെ കെ.കെ. പെട്രോളിയം ഉടമ വി. ജയദേവൻ പറഞ്ഞു. വിപണിയിൽ വൻ വിലക്കയറ്റത്തിനും തൊഴിൽ നഷ്ടത്തിനും കാരണമായേക്കാവുന്ന ഈ തുഗ്ലക്ക് പരിഷ്കാരത്തിൽ നിന്ന് കേന്ദ്ര സർക്കാർ അടിയന്തരമായി പിന്മാറണമെന്നാണ് തൊഴിലാളികളുടെയും വ്യാപാരികളുടെയും ആവശ്യം.
