കണ്ണൂർ :സംസ്ഥാനത്ത് പാചകവാതക വിതരണത്തിലുണ്ടായ കടുത്ത പ്രതിസന്ധി സാധാരണക്കാരെയും വ്യാപാരികളെയും ഒരുപോലെ വലയ്ക്കുന്നു. വാണിജ്യ സിലിണ്ടറുകളുടെ ലഭ്യത കുറഞ്ഞതോടെ കണ്ണൂർ ജില്ലയിൽ വിറകിന് ആവശ്യക്കാർ ഏറുകയും വില കുത്തനെ ഉയരുകയും ചെയ്തു. മുൻപ് ടണ്ണിന് 3,000 രൂപയിൽ താഴെയായിരുന്ന വിറകിന് ഇപ്പോൾ 5,000 രൂപയാണ് വിപണി വില. വരും ദിവസങ്ങളിൽ വില ഇനിയും ഉയരാൻ സാധ്യതയുണ്ടെന്ന് വ്യാപാരികൾ മുന്നറിയിപ്പ് നൽകുന്നു.
ഹോട്ടൽ മേഖലയിൽ സ്തംഭനം
ഗ്യാസ് ലഭിക്കാത്തതിനെത്തുടർന്ന് കണ്ണൂർ ജില്ലയിൽ മാത്രം ഏകദേശം 50 ഓളം ഹോട്ടലുകൾ ഇതിനകം അടച്ചുപൂട്ടി. പ്രവർത്തനം തുടരുന്ന പല ഹോട്ടലുകളും വിറകടുപ്പുകളിലേക്ക് മാറിയിരിക്കുകയാണ്. ടൺ കണക്കിന് വിറകാണ് ഹോട്ടലുകളിലേക്ക് ഇപ്പോൾ എത്തിക്കുന്നത്. ഈ പ്രതിസന്ധി വൈകാതെ പെട്രോൾ പമ്പുകളെയും ഗാർഹിക മേഖലയെയും ബാധിക്കുമെന്ന ആശങ്ക ശക്തമാണ്.
ഇൻഡക്ഷൻ കുക്കറുകൾക്ക് ഡിമാൻഡ് ഏറി
ഗ്യാസ് പ്രതിസന്ധി മറികടക്കാൻ ഗാർഹിക ഉപഭോക്താക്കൾ കൂട്ടത്തോടെ ഇൻഡക്ഷൻ കുക്കറുകളെ ആശ്രയിച്ചു തുടങ്ങി. ഇലക്ട്രോണിക്സ് കടകളിൽ ഇൻഡക്ഷൻ കുക്കറുകൾക്ക് വൻ വിൽപനയാണ് നടക്കുന്നത്. ഡിമാൻഡ് വർദ്ധിച്ചതോടെ ഇവയുടെ വിലയിലും വർദ്ധനവുണ്ടായിട്ടുണ്ട്.
സർക്കാർ ഇടപെടൽ
പ്രതിസന്ധി പരിഹരിക്കാൻ വിതരണത്തിൽ മുൻഗണനാക്രമം നിശ്ചയിക്കാനാണ് സംസ്ഥാന സർക്കാരിന്റെ തീരുമാനം. ഗാർഹികേതര സിലിണ്ടറുകളുടെ വിഹിതം വർദ്ധിപ്പിക്കാൻ കേന്ദ്ര സർക്കാരിനോട് ആവശ്യപ്പെടും. അതേസമയം, എൽപിജി (LPG) ആഭ്യന്തര ഉൽപാദനം 28 ശതമാനം വർദ്ധിപ്പിച്ചതായി കേന്ദ്ര സർക്കാർ അറിയിച്ചിട്ടുണ്ടെങ്കിലും വിപണിയിൽ ഇതിന്റെ ഗുണം ലഭ്യമായിത്തുടങ്ങിയിട്ടില്ല. വരും ദിവസങ്ങളിൽ ഭക്ഷ്യവസ്തുക്കളുടെ വിലക്കയറ്റത്തിനും ഈ സാഹചര്യം കാരണമായേക്കാം.
