കാഞ്ഞങ്ങാട്: കടന്നൽ കുത്തേറ്റ് ഭാര്യ വേദനകൊണ്ടു പിടയുന്നത് കണ്ട് പരിഭ്രാന്തനായ ഗൃഹനാഥൻ ഹൃദയാഘാതം മൂലം മരിച്ചു. കാഞ്ഞങ്ങാട് സൗത്ത് കൊവ്വൽ സ്റ്റോറിലെ അമ്പങ്ങാട് നാരായണൻ നായർ (75) ആണ് അന്തരിച്ചത്.
ശനിയാഴ്ച വൈകീട്ടായിരുന്നു ദാരുണമായ സംഭവം. വീട്ടുപറമ്പിൽ വീണുകിടന്ന തെങ്ങോല മാറ്റുന്നതിനിടെ ഭാര്യ രാജാമണിയെ കടന്നലുകൾ കൂട്ടമായി ആക്രമിക്കുകയായിരുന്നു. നിലവിളി കേട്ട് ഓടിയെത്തിയ നാരായണൻ നായർ, ഭാര്യയെ കടന്നലുകൾ പൊതിയുന്ന കാഴ്ച കണ്ട് തളർന്നുവീഴുകയായിരുന്നു. ഓടിക്കൂടിയ നാട്ടുകാർ ഉടൻ തന്നെ ഇരുവരേയും ആശുപത്രിയിൽ എത്തിച്ചെങ്കിലും നാരായണൻ നായരുടെ ജീവൻ രക്ഷിക്കാനായില്ല. കടന്നൽ കുത്തേറ്റ രാജാമണി നിലവിൽ ആശുപത്രിയിൽ ചികിത്സയിലാണ്.
പരേതരായ കേളുനായർ, കൃഷ്ണൻ എന്നിവരും ലക്ഷ്മിയുമാണ് സഹോദരങ്ങൾ. മക്കൾ: ഷിബു, ഷീബ (ഇരുവരും ഗൾഫിൽ). മരുമക്കൾ: മധു, ലയ.
