കണ്ണൂർ:തദ്ദേശ സ്ഥാപനങ്ങളിലേക്കുള്ള തിരഞ്ഞെടുപ്പിന്റെ വോട്ടെണ്ണൽ ശനിയാഴ്ച നടക്കും. ജില്ലയിൽ 20 കേന്ദ്രങ്ങളിലാണ് വോട്ടെണ്ണലിനായി ക്രമീകരണങ്ങൾ പൂർത്തിയാക്കിയിരിക്കുന്നത്. ബ്ലോക്കുതലത്തിലുള്ള കേന്ദ്രങ്ങളിൽ പഞ്ചായത്തുകളുടെയും, മുനിസിപ്പാലിറ്റി, കോർപ്പറേഷൻ തലങ്ങളിൽ അതത് സ്ഥാപനങ്ങളുടേതുമായ വോട്ടുകളാണ് എണ്ണുക.
വോട്ടെണ്ണൽ നടപടികൾ
വോട്ടെണ്ണൽ ശനിയാഴ്ച രാവിലെ 8 മണിക്ക് ആരംഭിക്കും.
* പോസ്റ്റൽ ബാലറ്റ്: വരണാധികാരിയുടെ ടേബിളിൽ ആദ്യം പോസ്റ്റൽ ബാലറ്റുകൾ എണ്ണിത്തുടങ്ങും. ഗ്രാമ, ബ്ലോക്ക് പഞ്ചായത്തുകളുടെ പോസ്റ്റൽ ബാലറ്റുകൾ അതത് വരണാധികാരികളുടെ സാന്നിധ്യത്തിൽ എണ്ണും. ജില്ലാ പഞ്ചായത്തിലേക്കുള്ള പോസ്റ്റൽ ബാലറ്റുകൾ കളക്ടറുടെ നേതൃത്വത്തിൽ കളക്ടറേറ്റിലാണ് എണ്ണുക.
* ഇ.വി.എം. വോട്ടുകൾ: പോസ്റ്റൽ ബാലറ്റിന് ശേഷം വോട്ടിങ് മെഷീനുകളിലെ വോട്ടുകൾ എണ്ണിത്തുടങ്ങും. സ്ട്രോങ് റൂമുകളിൽ നിന്ന് ഇലക്ട്രോണിക് വോട്ടിങ് മെഷീനിന്റെ കൺട്രോൾ യൂണിറ്റുകൾ മാത്രമാണ് കൗണ്ടിങ് ടേബിളുകളിൽ എത്തിക്കുക.
* സ്ട്രോങ് റൂം തുറക്കൽ: വരണാധികാരി, ഉപവരണാധികാരി, നിരീക്ഷകർ, സ്ഥാനാർഥികൾ, ഏജന്റുമാർ എന്നിവരുടെ സാന്നിധ്യത്തിലാണ് സ്ട്രോങ് റൂം തുറക്കുക.
*ക്രമീകരണം:വാർഡുകളുടെ ക്രമനമ്പർ പ്രകാരമായിരിക്കും വോട്ടിങ് മെഷീനുകൾ ഓരോ കൗണ്ടിങ് ടേബിളിലും വെക്കുക. ഒരു വാർഡിലെ എല്ലാ പോളിങ് സ്റ്റേഷനുകളിലെയും മെഷീനുകൾ ഒരു ടേബിളിൽവെച്ചുതന്നെയാണ് എണ്ണുക.
ഫലം ഉറപ്പാക്കൽ
വോട്ടിങ് മെഷീനിലെ കൺട്രോൾ യൂണിറ്റിൽ സീലുകളും സ്പെഷ്യൽ ടാഗും കൃത്യമായി ഉണ്ടെന്ന് സ്ഥാനാർഥികളുടെയോ ഏജന്റുമാരുടെയോ സാന്നിധ്യത്തിൽ പരിശോധിച്ച് ഉറപ്പുവരുത്തിയ ശേഷമായിരിക്കും വോട്ടെണ്ണൽ ആരംഭിക്കുക.
കൺട്രോൾ യൂണിറ്റിൽ നിന്ന് ആദ്യം പഞ്ചായത്ത് സ്ഥാനാർഥികളുടെയും തുടർന്ന് ബ്ലോക്ക് പഞ്ചായത്ത്, ജില്ലാ പഞ്ചായത്ത് സ്ഥാനാർഥികളുടെയും വോട്ടുവിവരം ലഭ്യമാകും. ഒരു വാർഡിലെ പോസ്റ്റൽ ബാലറ്റുകളും എല്ലാ ബൂത്തുകളിലെ വോട്ടുകളും എണ്ണിത്തീരുന്ന മുറയ്ക്ക് അതത് തലത്തിലെ വരണാധികാരി ഫലപ്രഖ്യാപനം നടത്തും.
തത്സമയ വിവരങ്ങൾ
ഓരോ ബൂത്തും എണ്ണിത്തീരുന്ന മുറയ്ക്ക് വോട്ടുനില 'TREND' എന്ന പ്ലാറ്റ്ഫോമിൽ അപ്ലോഡ് ചെയ്യും. അതുവഴി ലീഡ് നിലയും ഫലവും തത്സമയം അറിയാൻ സാധിക്കും.
വരണാധികാരി അനുവദിക്കുന്ന കൗണ്ടിങ് ഉദ്യോഗസ്ഥർ, തെരഞ്ഞെടുപ്പ് കമ്മീഷൻ ഉദ്യോഗസ്ഥർ, സ്ഥാനാർഥികൾ, ഏജന്റുമാർ എന്നിവർക്ക് മാത്രമാണ് വോട്ടെണ്ണൽ കേന്ദ്രത്തിൽ പ്രവേശനമുണ്ടാവുക.
