കണ്ണൂർ: അധ്യാപകർ അധ്യാപനത്തെ വെറും തൊഴിൽ മാത്രമല്ല, മെച്ചപ്പെട്ട സമൂഹ സൃഷ്ടിക്കാനുള്ള ഉത്തരവാദിത്വമായി കാണണമെന്ന് സംസ്ഥാന ബാലാവകാശ സംരക്ഷണ കമ്മീഷൻ ചെയർപേഴ്സൺ കെ.വി. മനോജ് കുമാർ പറഞ്ഞു. കണ്ണൂരിലെ ശിക്ഷക് സദനിൽ ഹൈസ്കൂൾ അധ്യാപകർക്കായി സംഘടിപ്പിച്ച ജില്ലാതല പരിശീലന പരിപാടി ഉദ്ഘാടനം ചെയ്യുകയായിരുന്നു അദ്ദേഹം.
വിദ്യാർത്ഥികളുടെ പ്രശ്നങ്ങൾ തിരിച്ചറിയാനും, പ്രത്യേകിച്ച് ടൈപ്പ്-1 പ്രമേഹബാധിതരായ കുട്ടികൾക്ക് ആവശ്യമായ പിന്തുണയും കരുതലും നൽകാനും അധ്യാപകർ ശ്രദ്ധിക്കണമെന്ന് അദ്ദേഹം ആവശ്യപ്പെട്ടു. കുട്ടികളുടെ സ്വകാര്യതക്ക് ഹാനികരമായ സ്കൂൾ ബാഗ് പരിശോധന പോലുള്ള നടപടികൾ ഒഴിവാക്കണമെന്നും അദ്ദേഹം പറഞ്ഞു.
സ്വയം പരിവർത്തനത്തിന് വിധേയരായി പുതുതലമുറക്ക് ദിശാബോധം നൽകാൻ അധ്യാപകർ തയ്യാറാകണമെന്ന് മനോജ് കുമാർ കൂട്ടിച്ചേർത്തു.
പരിശീലനത്തിൽ കമ്മീഷൻ അംഗം ഡോ. എഫ്. വിൽസൺ, ക്ലിനിക്കൽ സൈക്കോളജിസ്റ്റ് നിഖിത വിനോദ്, സൈബർ സുരക്ഷാ വിഭാഗത്തിലെ പി.കെ. ദിൻരാജ് എന്നിവർ ക്ലാസെടുത്തു. സംസ്ഥാനത്തുടനീളം ആഗസ്റ്റ് 20 വരെ നടക്കുന്ന പരിശീലനത്തിന്റെ ആദ്യഘട്ടം കണ്ണൂർ, കാസർകോട്, വയനാട്, കോഴിക്കോട്, മലപ്പുറം, പാലക്കാട്, തൃശൂർ ജില്ലകളിലാണ് സംഘടിപ്പിക്കുന്നത്.
പരിപാടിയിൽ ഡിഡിഇ ഡി.ഷൈനി അധ്യക്ഷയായി. കമ്മീഷൻ അംഗങ്ങളായ ഡോ.എഫ്.വിൽസൺ, അഡ്വ.ബി.മോഹൻകുമാർ, കെ.ഷാജു, അഡ്വ.ടി.സി.ജലജമോൾ, അഡ്വ.എൻ.സുനന്ദ, സിസിലി ജോസഫ്, ജില്ലാ ശിശുസംരക്ഷണ ഓഫീസർ ദിവ്യ മനോജ് എന്നിവർ പങ്കെടുത്തു.
