കണ്ണൂർ: സ്വർണം കടത്താൻ ശ്രമിച്ചെന്ന സംശയത്തെ തുടർന്ന് കണ്ണൂർ അന്താരാഷ്ട്ര വിമാനത്താവളത്തിൽ (KIAL) വെച്ച് കസ്റ്റംസ് ഉദ്യോഗസ്ഥർ തന്നോട് ക്രൂരമായി പെരുമാറുകയും നഗ്നനാക്കി പരിശോധന നടത്തുകയും ചെയ്തതായി പ്രവാസി യുവാവിന്റെ പരാതി. അനാവശ്യമായി പീഡിപ്പിക്കുകയും വ്യക്തിഹത്യ നടത്തുകയും ചെയ്തുവെന്ന് ചൂണ്ടിക്കാട്ടി പ്രവാസി യുവാവ് മുഖ്യമന്ത്രി പിണറായി വിജയനും ഉന്നത പോലീസ് അധികാരികൾക്കും പരാതി നൽകി.
വിദേശത്തുനിന്നെത്തിയ യുവാവിനെ സംശയത്തിന്റെ പേരിൽ തടഞ്ഞുവെച്ച് മണിക്കൂറുകളോളം ചോദ്യം ചെയ്യുകയും വസ്ത്രങ്ങൾ അഴിപ്പിച്ച് പരിശോധന നടത്തുകയുമായിരുന്നുവെന്ന് പരാതിയിൽ പറയുന്നു. എന്നാൽ, ദീർഘനേരത്തെ പരിശോധനയ്ക്ക് ശേഷവും ഇയാളുടെ പക്കൽ നിന്ന് നിരോധിത വസ്തുക്കളോ കടത്തുസ്വർണമോ കണ്ടെത്താൻ സാധിച്ചില്ല.
യാതൊരു തെളിവുമില്ലാതെ പൊതുമധ്യത്തിലും അധികൃതരുടെ മുന്നിലും തന്നോട് അപമര്യാദയായി പെരുമാറുകയും മാനസികമായി തകർക്കുകയും ചെയ്ത ഉദ്യോഗസ്ഥർക്കെതിരെ ശക്തമായ നടപടി സ്വീകരിക്കണമെന്ന് യുവാവ് പരാതിയിൽ ആവശ്യപ്പെട്ടു. സംഭവത്തിൽ കസ്റ്റംസ് അധികൃതരുടെ വിശദീകരണം ലഭ്യമായിട്ടില്ല.
