മട്ടന്നൂർ: കണ്ണൂർ അന്താരാഷ്ട്ര വിമാനത്താവളത്തിന്റെ റൺവേ വികസനത്തിനായുള്ള ഭൂമി ഏറ്റെടുക്കൽ നടപടികൾ സംസ്ഥാന സർക്കാർ ഊർജ്ജിതമാക്കി. പദ്ധതിയുടെ ഭാഗമായി കുടിയൊഴിപ്പിക്കപ്പെടുന്നവരുടെ പുനരധിവാസത്തിനും പുനഃസ്ഥാപനത്തിനുമുള്ള കരട് പദ്ധതി അന്തിമമാക്കുന്നതിനായി ഫെബ്രുവരി 5, 6 തീയതികളിൽ ഹിയറിംഗ് നടക്കും.
കീഴല്ലൂർ പഞ്ചായത്ത് ഹാളിൽ വെച്ചാണ് ഹിയറിംഗ് നടക്കുക. റൺവേ നിലവിലുള്ള 3050 മീറ്ററിൽ നിന്ന് 4000 മീറ്ററായി ദീർഘിപ്പിക്കുന്നതിനായി 245 ഏക്കർ (99.3235 ഹെക്ടർ) സ്വകാര്യ ഭൂമിയാണ് ഏറ്റെടുക്കുന്നത്.
ഹിയറിംഗ് സമയക്രമം:
* ഫെബ്രുവരി 5: കീഴല്ലൂർ ദേശത്തെ 38 പേർക്കും കാനാട് ദേശത്തെ 42 പേർക്കും.
* ഫെബ്രുവരി 6: കാനാട് ദേശത്തെ 79 പേർക്കും, കൂടാതെ ആരാധനാലയങ്ങൾ, ചെറുകിട വ്യാപാരികൾ, കരകൗശല വിദഗ്ധർ, സ്വയംതൊഴിൽ ചെയ്യുന്നവർ എന്നിവർക്കും.
പങ്കെടുക്കുന്നവർ അർഹത തെളിയിക്കുന്ന രേഖകളുടെ പകർപ്പുകൾ ഹാജരാക്കണം. ഭൂമി ഏറ്റെടുക്കുമ്പോൾ ഉപജീവനത്തെ ബാധിക്കുന്ന കെട്ടിട ഉടമകൾ, വാടകക്കാർ, തൊഴിലാളികൾ എന്നിവർക്ക് അർഹമായ നഷ്ടപരിഹാരവും പുനരധിവാസ പാക്കേജും ഉറപ്പാക്കുമെന്ന് സർക്കാർ വ്യക്തമാക്കിയിട്ടുണ്ട്.
റൺവേ വികസനം ത്വരിതപ്പെടുത്തുമെന്ന് മുഖ്യമന്ത്രി പിണറായി വിജയൻ നേരത്തെ നിയമസഭയിൽ കെ.കെ. ശൈലജ എം.എൽ.എയുടെ സബ്മിഷന് മറുപടിയായി അറിയിച്ചിരുന്നു. 2020 സെപ്റ്റംബറിലാണ് ഭൂമി ഏറ്റെടുക്കലിനുള്ള പ്രാഥമിക വിജ്ഞാപനം പുറപ്പെടുവിച്ചത്.
