കണ്ണൂർ ഇരിവേരിയിൽ പേപ്പട്ടി ആക്രമണത്തിൽ കടിയേറ്റവരെ ജില്ലാ മെഡിക്കൽ ഓഫീസറുടെ നേതൃത്വത്തിൽ ഉള്ള സംഘം സന്ദർശിച്ചു..
ഇന്നലെ രാവിലെയോട് കൂടിയാണ് ഇരിവേരിയിലും പരിസരങ്ങളിലുമായി പേപ്പട്ടിയുടെ ആക്രമണം ഉണ്ടായത്.കുട്ടികളടക്കം നിരവധിപ്പേർക്ക് കടിയേറ്റിരുന്നു. കടിയേറ്റവരിൽ 30 പേർ ജില്ലാശുപത്രിയിൽ ചികിത്സ തേടി. നിലവിൽ ഒരാൾ ജില്ലാശുപത്രിയിൽ അഡ്മിറ്റ്‌ ആണ്. വാക്സിൻ അലർജിയുള്ള രണ്ടുപേരെ മെഡിക്കൽ കോളേജിലേക്ക് റെഫർ ചെയ്തിരുന്നു.
നിലവിൽ ചികിത്സ തേടിയ എല്ലാവർക്കും വാക്സിൻ നൽകിയിട്ടുണ്ട്.
ജില്ലാ മെഡിക്കൽ ഓഫീസർ ഡോ പിയുഷ് എം നമ്പൂതിരിപ്പാടിന്റെ നേതൃത്വത്തിലുള്ള സംഘം ജില്ലാശുപത്രി സന്ദർശിച്ചു സ്ഥിതി ഗതികൾ വിലയിരുത്തി.
ജില്ലയിൽ ആവശ്യത്തിന് പേവിഷ പ്രതിരോധ വാക്സിനുകൾ ലഭ്യമാണ് എന്നും കടിയേറ്റവർക്ക് ആവശ്യമായ എല്ലാ വിധ ചികിത്സകളും ഉറപ്പു വരുത്തുമെന്നും കടിയേറ്റവർ ആശങ്കപ്പെടേണ്ടതില്ല എന്നും ഡി എം ഒ അറിയിച്ചു.
പേ വിഷ ബാധ -ശ്രദ്ധിക്കേണ്ട കാര്യങ്ങൾ:-
♦️വളർത്തു മൃഗങ്ങളുടെയോ തെരുവ് നായ്ക്കളുടെയോ കടിയോ മാന്തലോ ഏറ്റാൽ ആ ഭാഗം നന്നായി സോപ്പ് ഉപയോഗിച്ച് പൈപ്പ് തുറന്നു വെച്ച് 15 മിനിറ്റ് വെള്ളത്തിൽ കഴുകാൻ എല്ലാവരും ശ്രദ്ധിക്കണം.
♦️മുറിവുള്ള ഭാഗം നന്നായി കഴുകിയതിനു ശേഷം ഏറ്റവും അടുത്തുള്ള പേ വിഷ ബാധക്കുള്ള വാക്സിൻ ലഭ്യമാകുന്ന ആശുപത്രിയിലേക്ക് എത്തി വാക്സിൻ സ്വീകരിക്കണം.
♦️വളർത്തു മൃഗങ്ങളുടെയോ മറ്റോ കടിയോ മാന്തലോ ഏറ്റാൽ വാക്സിൻ സ്വീകരിക്കണോ വേണ്ടയോ എന്നത് സംബന്ധിച്ച മാർഗ നിർദേശം ലഭിക്കുന്നതിനായി ഡോക്ടറുടെ സേവനം തേടണം. മറ്റ് അഭിപ്രായങ്ങൾ സ്വീകരിക്കരുത്. വാക്സിൻ സ്വീകരിക്കുന്നത് സംബന്ധിച്ച മാർഗ നിർദ്ദേശവും വാക്സിൻ ആവശ്യമെങ്കിൽ അവയും ആശുപത്രികളിൽ നിന്ന് ലഭിക്കും.
♦️പേ വിഷ ബാധക്കെതിരെയുള്ള വാക്സിൻ വളരെയേറെ സുരക്ഷിതവും ജീവൻ രക്ഷിക്കുന്നതുമാണ്.
♦️ചെറിയ കുട്ടികളെ വളർത്തു മൃഗങ്ങളോ മറ്റോ മാന്തുകയോ കടിക്കുകയോ ചെയ്താൽ അക്കാര്യം രക്ഷിതാക്കളോട് പറയാൻ പറയണം. കുട്ടികൾ മൃഗങ്ങളുമായി ഇടപഴകുന്ന ശീലം പരമാവധി കുറക്കണം.*
♦️വളർത്തു മൃഗങ്ങൾക്ക് പേ വിഷ ബാധക്കെതിരെ യുള്ള വാക്സിനേഷൻ നിർബന്ധമായും എടുക്കണം.അതിനു ഉടമസ്ഥൻ മാർ ശ്രദ്ധിക്കണം.
♦️തെരുവ് നായ്ക്കളുടെ ശല്യം കൂടി വരുന്ന സാഹചര്യത്തിൽ അവ കൂട്ടമായി കാണപ്പെടുന്ന ഇടങ്ങളിൽ അവയ്ക്ക് ഭക്ഷണം ലഭിക്കുന്നുണ്ടാകണം. ഭക്ഷണ മാലിന്യം, ഇറച്ചി കടകളിൽ നിന്നുള്ള മാലിന്യം ഉൾപ്പെടെയുള്ള ജൈവ മാലിന്യങ്ങൾ വലിച്ചെറിയരുത്.ജൈവ മാലിന്യം കൂട്ടിയിട്ട സ്ഥലങ്ങൾ വൃത്തിയാക്കണം.ഇക്കാര്യം ഗൌരവപൂർവ്വം ശ്രദ്ധിക്കണം.
♦️വളർത്തു നായകളെ ഒരു കാരണവശാലും തെരുവിൽ ഉപേക്ഷിക്കരുത്.
♦️ഭിക്ഷാടനം ചെയ്യുന്നവർ,അലഞ്ഞു തിരിയുന്നവർ, ആരാധനാലയങ്ങളോട് ചേർന്നു ജീവിച്ചു പോരുന്ന അശരണർ ഉൾപ്പെടെയുള്ളവർക്ക് പേപട്ടി കളുടെ കടിയേൽകാൻ സാധ്യതയുണ്ടാകും.അവർക്ക് പേ വിഷ വാക്സിൻ സ്വീകരിക്കാനുള്ള അറിവോ സാഹചര്യമോ ഉണ്ടെയെന്നു വരില്ല.അവരെ പ്രത്യേകം കരുതണം.
♦️പേ വിഷ ബാധക്കെതിരെയുള്ള വാക്സിൻ ബന്ധപ്പെട്ട സർക്കാർ ആശുപത്രികളിൽ ലഭ്യമാണ്.
