കണ്ണൂർ :തായെത്തെരു റോഡിലെ സ്വകാര്യസ്ഥാപനത്തിൽ ഒരുരൂപ നോട്ടുമായെത്തിയാൽ ഷൂ ലഭിക്കുമെന്ന പരസ്യം കണ്ട് ആളുകൾ തടിച്ചുകൂടി ഗതാഗതം സ്തംഭിച്ചു. തായെത്തെരുറാേഡിൽ പുതുതായി പ്രവർത്തനം തുടങ്ങിയ കടയുടെ പരസ്യം സോഷ്യൽ മീഡിയ വഴി കണ്ടാണ് കൗമാരക്കാരും യുവാക്കളും ഞായർ രാവിലെ കടയ്ക്ക് മുന്നിൽ തടിച്ചുകൂടിയത്. ഒരുരൂപ നോട്ടുമായി എത്തിയാൽ ഷൂ വാങ്ങാമെന്ന് നേരത്തെ വ്ളോഗർമാർ വഴി സോഷ്യൽ മിഡിയയിൽ പരസ്യം നൽകിയിരുന്നു. പകൽ 12 മുതൽ മൂന്നുവരെയാണ് സ്ഥാപനം ഈ ഓഫർ നൽകിയിരുന്നത്. എന്നാൽ രാവിലെ പത്തിനു തന്നെ കടയ്ക്ക് സമീപം തായെത്തെരു റോഡിൽ ആളുകൾ തടിച്ചുകൂടി. ആളുകൾ കൂട്ടത്തോടെ എത്തിയതോടെ തിരക്ക്‌ നിയന്ത്രിക്കാൻ സാധിക്കാതെയായി. ഗതാഗതക്കുരുക്കും അനുഭവപ്പെട്ടു. തുടർന്ന് കണ്ണൂർ ടൗൺ പൊലീസ് സ്ഥലത്തെത്തി ആളുകളെ നിയന്ത്രിച്ചു. വഴിയാത്രക്കാർക്കും വാഹനയാത്രക്കാർക്കും മാർഗതടസം സൃഷ്ടിച്ചതിന് കടയുടമകൾക്കെതിരെ പൊലീസ് കേസെടുത്തു.
